Қарақалпақстан Республикасы Жоқарғы Кеңеси

⌂ ЎЗ ҚР РУ EN

БЮДЖЕТКЕ ҚОСЫМША ДӘРАМАТ — АБАДАН ТУРМЫСЫМЫЗДЫҢ ГИРЕЎИ

Қарақалпақстан Республикасы Жоқарғы Кеңесинде бюджетке қосымша дәрамат түсириў дәреклерин анықлаў ҳәм оларды өндириў мәселелерине  бағышланған мәжилис болып өтти.

Илажға республикалық жумысшы топардың ағзалары, Өзбекстан Республикасы Олий Мажлиси Сенатының ағзалары, жергиликли Кеңеслердиң депутатлары, тийисли министрликлер, кәрхана, мәкеме ҳәм шөлкемлердиң басшылары қатнасты.

Мәжилисте Қарақалпақстан Республикасы Жоқарғы Кеңесиниң Баслығы М.Ерниязов, Өзбекстан Республикасы Есап палатасы баслығының биринши орынбасары О.Рустамов, Өзбекстан Республикасы Бас прокурорының орынбасары А.Мавланов шығып сөйлеп, республикамызда бюджетке қосымша дәрамат түсириў бойынша белгиленген режениң орынланыў барысы, соның менен бирге, орын алып атыр­ған айырым кемшиликлерге тоқтап өтти.

Атап өтилгениндей, Президентимиздиң басшылығында усы жыл 12-сентябрь күни болып өткен мәжилисте бюджетке қосымша дәрамат түсириў  мәселеси талқыланып, бул бойынша анық ўазыйпалар белгилеп берилди. Усыған муўапық, быйылғы жылы республикамызда  жәми 800 миллиард сумлық қосымша дәрамат түсириў белгиленген болса, алдын ала есап-санақлар бойынша барлық  дәреклерден  1 триллион сумлық түсимлер түсириў имканияты бар екенлиги атап өтилди.

Бүгинги күни бюджетке қосымша дәрамат түсириў дәреклерин анықлаў ҳәм оны өндириў  бойынша штаб жумыс алып бармақта. Буннан тысқары, Өзбекстан Республикасы Есап палатасы, Бас прокуратура, Қаржы минис­трлиги ҳәм салық комитетлериниң биргеликтеги қоспа қарарлары тийкарында 4 бағдар бойынша қалалық ҳәм ра­йонлық жумысшы топарлар дүзилип, оларға анық ўазыйпалар белгилеп берилди.

Ҳақыйқатында да, бюджетке қосымша дәрамат түсириў бул экономикамыздың буннан былай да беккемлениўиниң, халқымыздың бахытлы ҳәм абадан турмысын тәмийинлеўдиң исенимли кепили болып табылады. Быйылғы жылдың өткен 9 айы даўамында бюджетке жәми 1 триллион 709 миллиард сумлық түсим әмелге асырылған болса, усы дәўир ишинде қарар тийкарында белгиленген бюджет прогнозына қосымша  656 миллиард сумлық түсим әмелге асырылды. Усы қосымша дәраматлардан бүгинги күнге 401 миллиард сумлық қаржы халқымыздың ийгилиги жолында сарпланды. Атап айтқанда, 225 миллиард сум социаллық объектлерди реконструкциялаў ҳәм оларды инвентарьлар менен тәмийинлеўге, соның ишинде,  9 миллиард сум медициналық әсбап-үскенелерге,  44,5 миллиард сумы «Абат аўыл» ҳәм «Абат мәҳәлле» бағдарламаларында белгиленген илажларды әмелге асырыўға, 20,5 миллиард сум Нөкис әскерий горнизонындағы объектлердиң реконструкциясы ушын, 12,2 миллиард сумы Қоңырат районындағы «Қарақалпақстан» посёлкалық пуқаралар жыйыны аймағындағы социаллық объектлерди реконструкциялаў ҳәм оларды инвентарьлар менен тәмийинлеўге, 48,8 миллиард сум халықты социаллық қорғаў ҳәм жаңа жумыс орынларын жаратыўға байланыслы машқалаларды шешиўге,  10,4 миллиард сум халқымыздың жәрдемге мүтәж қатламын турақ жайлар менен тәмийинлеўге жумсалады.

Усындай кең көлемдеги илажлар менен бир қатарда айырым кемшиликлердиң орын алып атырғанлығы мәлим болды. Атап айтқанда, Төрткүл,  Беруний, Хожели, Шымбай районларында, Нөкис қаласында бир қатар субъект­лердиң дизимнен өтпестен жумыс алып барып атырғанлығы, айырым объектлерде касса аппаратлары менен тәми­йинленбегенлиги, Қоңырат, Төрткүл, Елликқала, Беруний, Тақыятас ҳәм Қараөзек районларында бюджет алдындағы салық қарыздарлығы жыл басына салыстырғанда өсип кеткенлиги сынға алынды.

Илаж соңында бул бағдардағы жумысларды еле де жетилистириў, орын алып атырған машқалаларды сапластырыў  бойынша ўазыйпалар белгиленди.

 

Басқа жаңалықлар RSS

10.11.2018 МЕДИЦИНА ХЫЗМЕТКЕРЛЕРИНЕ ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИ ҲӘМ МИНИСТРЛЕР КЕҢЕСИНИҢ ҚУТЛЫҚЛАЎЫ

Ҳүрметли шыпакерлер ҳәм медицина тараўы хызметкерлери!
Бәршеңизди ҳәр жылы елимизде кеңнен белгиленип киятырған кәсиплик байрамыңыз – «Медицина хызметкерлери күни» менен Қарақалпақстан Республикасы Жоқарғы Кеңеси ҳәм Министрлер Кеңеси атынан қызғын қутлықлаймыз. 

06.11.2018 ЖОҚАРҒЫ КЕҢЕСТЕГИ ҚАБЫЛЛАЎ

Қарақалпақстан Республикасы Жоқарғы Кеңесинде Түркияның Өзбекстандағы Айрықша ҳәм толық ҳуқықлы елшиси Аҳмет Башар Шен басшылығындағы делегацияны қабыллаў мәресими болды.

06.11.2018 «ТАШКЕНТ» МИЙМАНХАНАСЫ МИЙМАНЛАР ХЫЗМЕТИНДЕ

Усы жыл 6-ноябрь күни пайтахтымыз Нөкис қаласында «Ташкент» мийманханасы пайдаланыўға тапсырылды.

05.11.2018 ПАРЛАМЕНТ КОМИССИЯСЫ АҒЗАЛАРЫ ПАХТА АТЫЗЛАРЫНДА

Өзбекстан Республикасы Олий Мажлиси Сенатының 2017-жыл 4-октябрьдеги “Өзбекстан Республикасының нызам ҳүжжетлерине ҳəм халықаралық мийнет стандартларына муўапық пуқаралардың кепилленген мийнет ҳуқықларын тəмийинлеўге байланыслы илажларды күшейтиў ҳаққында”ғы СҚ-231-III-санлы қарарына муўапық Пуқаралардың кепилленген мийнет ҳуқықларын тəмийинлеў мəселелери бойынша Парламент комиссиясы дүзилген еди.

 

03.11.2018 ҚАРАҚАЛПАҚСТАН РЕСПУБЛИКАСЫ ЖОҚАРҒЫ КЕҢЕСИНИҢ ГЕЗЕКСИЗ ЖИГИРМА ҮШИНШИ СЕССИЯСЫ БОЛЫП ӨТТИ

Усы жылдың 3-ноябрь күни Қарақалпақстан Республикасы Жоқарғы Кеңесиниң гезексиз жигирма үшинши сессиясы болып өтти.