Қарақалпақстан Республикасы Жоқарғы Кеңеси

⌂ ЎЗ ҚР РУ EN

САХНАДА — ТОҒЫЗ ТОҢҚЫЛДАҚ...

«Той десе қуў бас жумалайды» дегениндей Ғәрезсизлик байрамы қарсаңында таза имараты пайдаланыўға тапсырылған пайтахтымыздағы Қарақалпақ мәмлекетлик жас тамашагөйлер театры әтирапы байрам түсине енип, әтирапына көркем өнер, шайдалары, жаслар, қулласы усы тараўға қызығыўшы ықласбентлер менен толысты.
Солай етип, театр жәмәәти тәрепинен Қарақалпақстан халық шайыры, Қарақалпақстан Республикасына мийнети сиңген көркем өнер ғайраткери, Бердақ атындағы мәмлекетлик сыйлықтың лауреаты К.Рахмановтың «Тоғыз тоңқылдақ, бир шиңкилдек» атлы спектакли тамашагөйлер нәзерине усынылып, театрдың жаңа 40-мәўсими ашылды.
Жаңа мәўсимди театр директоры П.Айтмуратов кирис сөз бенен ашты. Буннан соң сөзге шыққан Өзбекстан ҳәм Қарақалпақстан Республикаларына мийнети сиңген көркем өнер ғайраткери, белгили композитор Н.Мухаммеддинов, Өзбекстан халық артистлери Б.Матжанов, Н.Аңсатбаевлар сөзге шығып, мәдениятымыз тараўындағы жетискенликлер, шешилиўи тийис машқалалар жөнинде айтып өтип, театр жәмәәтиниң алдағы дөретиўшилик жумысларына табыслар тиледи.
Буннан соң театр ықласбентлери спектакльди тамашалады. Спектакльде рольлерде Шиңкилдек (артист Б.Жапаров), Ешнияз (артист Ж.Абыллаев), Дошнияз (артист С.Арзиев), Хошнияз (артист П.Келимбетов), Нурымбет (артист М.Нуратдинов), Сырымбет (артист.Бердибеков), Елмурат (артист И.Бегжанов), Қалмурат (Қарақалпақстанда хызмет көрсеткен артист Ж.Абдимов), Палмурат (артист А.Халмуратов), Жийемурат қарақшы (артист Р.Уразбаев), Ҳәким бай (артист Ш.Дәўлетмуратов), Алланияз бай (артист Р.Тлемисов) лар шеберлик пенен атқарып шықты.
Спектакльде шиңкилдек ҳәм тоғыз тоңқылдақтың өмирдеги ҳәрекетлери тамашагөйлерге күлкили ҳәм қызықлы етип сәўлеленген.
— Бул спектакльди балалығымнан қайта-қайта қызығыўшылық пенен көк экран арқалы тамашалап бараман. Бүгин спектакльди көрип отырып, бунда рольлерди атқарып атырған жас актёрлар сюжетке сай жазылған нама ырғақлары, сахнаның безелиўи, қаҳарманлардың  кийимлери ҳәммеси де шеберлик пенен таңланғанлығының гүўасы болдым. Бул жердеги барлық дөретиўшилерге миннетдарман,-дейди тамашагөйлердиң бири нөкисли Б.Турғанбаев.
Спектакль жуўмақланыўына қарамастан тамашагөйлер дағымастан қызғын қол шаппатлаўлар менен дөретиўшилик жәмәәтти қутлықлап,  бул дөретпениң тарийхый ўақыяға айланатуғынлығын және бир мәрте атап өтти.
Мәўсимниң ашылыўында Қарақалпақстан Республикасы Жоқарғы Кеңесиниң комитет баслығы Д.Қурбаниязов қатнасты

 

 

Басқа жаңалықлар RSS

12.03.2019 54 ШАҢАРАҚ ТУРАҚ ЖАЙ МЕНЕН ТƏМИЙИНЛЕНДИ

Усы жылы 12-март күни Тақыятас районында республикамыз бойынша 54 кем тәмийинленген шаңараққа Өзбекстан кәсиплик аўқамлары Федерациясының қәўендерлигинде жаңа турақ жайларды тапсырыў салтанаты болып өтти.

11.03.2019 СОЦИАЛЛЫҚ ТАРАЎДЫ РАЎАЖЛАНДЫРЫЎҒА ИТИБАР

Усы жыл 11-март күни Қарақалпақстан Республикасы Жоқарғы Кеңесинде 2017-2021-жылларда Өзбекстан Республикасын раўажландырыўдың бес тийкарғы бағдары бойынша Ҳәрекетлер стратегиясын «Жедел инвестициялар ҳәм социаллық раўажланыў жылы»нда  әмелге асырыўға байланыслы Мәмлекетлик бағдарламаның, соның ишинде, социаллық тараўды раўажландырыў бойынша ўазыйпалардың орынланыўына бағышланған семинар болып өтти.