Қарақалпақстан Республикасы Жоқарғы Кеңеси

⌂ ЎЗ ҚР РУ EN

Баспасөз ҳәм ғалаба хабар қураллары хызметкерлери күнине байланыслы Қарақалпақстан Республикасы Жоқарғы Кеңеси менен Министрлер Кеңесиниң байрам қутлықлаўы

Әзиз дослар!

Бәршеңизди бүгинги кәсиплик барамыңыз, 27-июнь — Баспасөз ҳәм ғалаба хабар қураллары хызметкерлери күни менен Қарақалпақстан Республикасы Жоқарғы Кеңеси ҳәмде Министрлер Кеңеси атынан қызғын қутлықлаймыз.

Күнделикли турмысымыздың ажыралмас бөлеги есапланған ғалаба хабар қураллары ҳаққында сөз еткенде барқулла жаңалыққа умтылып жасайтуғын, әдиллик ҳәм ҳақыйқатлықтың жанкүйерлери, жәмийеттеги ҳәр қандай мәселе ҳәм машқалаларды өткир көзқарас пенен көтерип шығатуғын, жоқары талант
ийелери – дөретиўши инсанлар көз алдымызға келеди.

Сизлердиң елимиз ғәрезсизлигин және де беккемлеў, оның социаллық-экономикалық раўажланыўына мүнәсип үлес қосыў, миллетлераралық татыўлықты тәмийинлеў, халқымыздың бахытлы ҳәм абадан турмысы менен байланыслы басқа да ийгиликли ислерге қосып атырған үлесиңизди жоқары баҳалаймыз.

Өзлериңизге жақсы мәлим, Ҳүрметли Президентимиз өткен жылдың
3-август күни дөретиўши-зыялылар менен ушырасып, әдебият, көркем өнер, мәденият тараўларын ҳәмде ғалаба хабар қуралларын буннан былай да раўажландырыў, олардың жумыс нәтийжелилигин арттырыў, дөретиўши инсанларды ҳәр тәреплеме қоллап-қуўатлаў бүгинги күнниң әҳмийетли ўазыйпаларынан бири екенине айрықша итибар қаратты.

Өткен қысқа дәўир ишинде Ҳүрметли Президентимиз тәрепинен баспасөз ҳәм мәлимлеме тараўын басқарыўды жетилистириў, Журналистлер дөртиўшилик аўқамының, ғалаба хабар қуралларының, Баспасөз ҳәм хабар агентлигиниң жумысларын буннан былай да раўажландырыў, тараў хызметкерлериниң мийнетлерин хошаметлеў бойынша қабыл етилген пәрман ҳәм қарарлар турмысымызда айрықша орын тутпақта.

Соны да атап өтиў орынлы, Ҳүрметли Президентимиз  «Ел-журтымыздың жақсы арзыў-нийетлерин жүзеге шығарыў, бул жолдағы ҳәр қыйлы тосқынлықларды, бюрократизм, итибарсызлық, дәмегөйлик, коррупция сыяқлы унамсыз иллетлерди исенимлилик пенен көтерип шығып, оларға қарсы аяўсыз жәмийетшилик пикирин қәлиплестириўди өз кәсибиниң, өз өмириниң мазмун-мәниси деп билетуғын журналистлерди мен ҳақыйқый журналист, деп есаплайман», - деген пикирге айрықша тоқтап өтти.

Бул терең мазмунлы пикирлердиң турмысымызда қаншелли әҳмийетли орын ийелейтуғынын, Сизлерге айрықша жуўапкершилик жүклейтуғынын ҳәр бириңиз жүректен сезинип, бүгинги алып барып атырған жумысларыңызға, пикирлеў дүньяңызға, билим дәрежеңизге, мәдениятыңыз ҳәм басқа да сыпатларыңызға сын көзқарастан баҳа бериўиңиз тийис, деп есаплаймыз.

 Ҳәммемизге жақсы мәлим, ҳәзирги ўақытта тек ғана жәмийетлик-сиясий, социаллық-экономикалық турмысымызда емес, ҳәр бир инсанның ишки дүньясында, өмирге деген көзқарасларында үлкен өзгерислер менен жаңаланыўлар жүз бермекте.

Ҳәзирги глобалласыў ҳәм информация дәўири ҳәр бир журналисттен, радио, телевидение ҳәм баспасөз тараўы хызметкерлеринен дәўирге сай қәдем таслаўды, өз үстинде, жаңадан-жаңа темалар әтирапында тынымсыз излениўлер алып барыўды, жаңаша пикирлеўди қатаң талап етпекте.

Солай екен, ғалаба хабар қуралларын және де демократияластырыў, баспасөздиң сапасын ҳәм тәсиршеңлигин арттырыў, тартымлы темалар дөгерегинде излениў, теле-радио өнимлерин таярлаўда дөретиўши
инсанлардың жуўапкершилигин күшейтиў, эфир мәдениятын тәмийинлеў, интернет журналистикасында исенимли дәреклерге сүйениў сыяқлы бир қатар мәселелерге итибарды күшейтиў бүгинги күндеги кешиктириўге болмайтуғын ўазыйпалардан саналады. 

Бердақ атындағы Қарақалпақ мәмлекетлик университетиниң журналистика қәнигелигине қабыллаў квотасының өткен жылларға салыстырғанда еки есеге көбейгенин жасларымызға, тараўға деген жоқары итибар деп қабыл етип, бул қәнигеликке билимли, талантлы, дөретиўшилик жумысларға деген ықласы күшли болған жасларды таңлап алыў мәселесине жуўапкершилик пенен қараў тийис екенин атап өтемиз.

 Быйылғы жылы «Қарақалпақстан» баспасы өзиниң 90 жыллық, районлық «Тўрткўлнома» газетасы 85 жыллық, «Шоманай нуры» газетасы 65 жыллық,
«Давр кўзгуси» газетасы 40 жыллық, тараўлық «Қарақалпақстан мәденияты» газетасы 25 жыллық, «Устаз жолы» газетасы 20 жыллық қутлы сәнелерин кең түрде белгилеўи – қарақалпақ журналистикасы мүнәсип раўажланыў басқышларынан өткенин және бир мәрте дәлиллейди.

Қәдирли дослар!

Елимиз раўажланыўдың жаңа басқышларына қадем койып атырған бүгинги күнде барлық тараўларда алып барылып атырған реформалардың мазмун-мәнисин ҳәмде әҳмийетин терең аңлай отырып, гүллән халқымызды және де ийгиликли ислер әтирапында жәмлестирип, оларды уллы дөретиўшилик жумысларға руўхландыратуғыныңызға беккем исенемиз.

Сизлерди кәсиплик байрамыңыз бенен және бир мәрте қызғын қутлықлап, бәршеңизге беккем денсаўлық, шаңарақларыңызға аманлық, дөретиўшилик жумысларыңызда тасқын табыслар тилеймиз.

Қарақалпақстан Республикасы Жоқарғы Кеңеси                                                                                   Қарақалпақстан Республикасы Министрлер Кеңеси

 

Басқа жаңалықлар RSS

11.07.2018 КЕМШИЛИКЛЕР СЫНҒА АЛЫНЫП, ЎАЗЫЙПАЛАР БЕЛГИЛЕНДИ

Усы жыл 11-июль күни Қарақалпақстан Республикасы Жоқарғы Кеңесинде Инвестиция бағдарламасына кирген объект­лерде қурылыс, реконструкция ҳәм капитал оңлаў жумысларының барысы, 4 сектор басшылары тәрепинен сырт ел инвес­тицияларын тартыўға қаратылған илажлардың социаллық-экономикалық раўажландырыўға кирген жойбарлардың әмелге асырылыўы ҳаққындағы мәселелерге бағышланған мәжилис болып өтти.

11.07.2018 ЖАСЛАР ИСКЕРЛИГИ, ЖАҢА ИДЕЯЛАР ҲӘМ ЖОЙБАРЛАР ҚОЛЛАП-ҚУЎАТЛАНДЫ

Усы жылдың 27-июнь күни Өзбекстан Республикасы Президентиниң «Жаслар — келешегимиз» Мәмлекетлик бағдарламасы ҳаққында»ғы Пәрманы қабыл етилди. Усы Пәрманның орынланыўын тәмийинлеў бойынша, жаслар арасында ушырасып атырған машқалаларды үйрениў мақсетинде республикамыз бойынша исши топар дүзилди.

10.07.2018 «НӨКИС ХАЛЫҚАРАЛЫҚ АЭРОПОРТЫ» ЖАҢАРМАҚТА

Ғәрезсизлигимиздиң дәслепки күнлеринен-ақ елимизде барлық тараўлар сыяқлы авиация саласы да тез пәт пенен раўажлана баслады.
1992-жылы 28-январьда қайта шөлкемлестирилген «Өзбекстан ҳаўа жоллары» миллий авиакомпаниясы Халықаралық Пуқаралық авиация (ИКАО) шөлкеминиң тең ҳуқықлы ағзасы болып, халықаралық авиатасыўлар базарында мүнәсип орын ийелеўге ерис­ти. Елимиздеги барлық аэропортлар қайта реконструкцияланып, заманагөй ҳаўа лайнерлери менен тәмийинленди ҳәм бул илажлар бүгинги күнде де даўам етпекте.

30.06.2018 КЕЛЕШЕК ҚУРЫЎШЫЛАРЫНЫҢ ЕСТЕ ҚАЛАРЛЫҚ БАЙРАМЫ

2017-жылдың 30-июнь сәнеси елимиз жасларының турмысында ең умытылмас күнлердиң бири болып қалады.

Усы күни Ташкенттеги Симпозиумлар сарайында болып өткен Өзбекстан «Камалат» жаслар жәмийетлик ҳәрекетиниң IV қуралтайында  Өзбекстан Республикасы Президенти Шавкат Мирзиёевтиң тиккелей басламасы менен «Жаслар — келешек  қурыўшылары» сүрени астында профессионал жумыс­ты әмелге асыратуғын Өзбекстан Жаслар аўқамы шөлкемлестирилди. Аўқам шөлкемлестирилген күн — 30-июнь сәнеси елимизде «Жаслар күни» сыпатында белгиленетуғын болды.

21.06.2018 ШАЙЫР ДӨРЕТИЎШИЛИГИНЕ БАҒЫШЛАНДЫ

Бердақ атындағы Қарақалпақ мәмлекетлик академиялық музыкалы театрында  Өзбекстанға хызмет көрсеткен мәденият хызметкери, Қарақалпақстан халық шайыры Гүлистан Матякубованың дөретиўшилигине бағышланған «Сөз ҳәм саз сыйқыры» темасында әдебий әнжуман болып өтти.