Қарақалпақстан Республикасы Жоқарғы Кеңеси

⌂ ЎЗ ҚР РУ EN

ХАЛЫҚАРАЛЫҚ КОНФЕРЕНЦИЯ ҚАТНАСЫЎШЫЛАРЫ РЕСПУБЛИКАМЫЗДА

Усы жылы 7-8-июнь күнлери Ташкент қаласында болып өткен «Арал машқаласы ақыбетлерин сапластырыў бойынша биргеликтеги ҳәрекетлер: жаңаша қатнаслар, инновациялық шешимлер ҳәм инвестициялар» темасындағы халықаралық конференцияның қатнасыўшылары республикамызда болды.

Нөкис халықаралық аэропортында мийманларды Қарақалпақстан Республикасы Жоқарғы Кеңесиниң Баслығы М.Ерниязов күтип алды. Делегация ағзалары усы жерден Мойнақ ра­йонына жөнеп кетти.

Халықаралық конференцияның қатнасыўшылары район басшылары, кең жәмийетшилик ўәкиллери тәрепинен салтанатлы жағдайда күтип алынды. Мийманлар «Кемелер қойымшылығы»нда болып, бир ўақытлары теңиз суўының усы жағалыққа мәўиж урып турғанлығы, бүгинги күнги ашынарлы жағдайы менен жақыннан танысты. Районның өтмиши ҳәм бүгинги турмысы, жергиликли халықтың, соның ишинде балықшылардың, усы аймақта туўылып өткен  белгили инсанлардың өмири және дөретиўшилиги сәўлелендирилген музей экспонатлары менен танысты.

Орайлық Азия еллери парламентлериниң депутатлары, министрликлер менен ведомстволардың басшылары, жергиликли ҳәм сырт ел қәнигелери, БМШ, Халықаралық Аралды қутқарыў қоры, Орайлық Азия регионаллық экология орайы, Жәҳән банки, Арал бойындағы экологиялық жағдайды жақсылаўға қаратылған жойбарларға инвестиция киргизиўге мәпдар сырт ел компаниялары, халықаралық шөл­кемлер, жетекши қаржы институтлары, МКШ ҳәм ҒХҚ ўәкиллериниң қатнасқанлығы илаждың қаншелли әҳмийетли екенлигинен дәрек береди. Себеби, Арал машқаласы жәҳән жәмийетшилиги тәрепинен бүгинги күнниң глобал машқалаларынан бири сыпатында тән алынған.

Өзбекстан Республикасы тәрепинен Арал апатшылығы ақыбетлерин сапластырыў, усы аймақта жасаўшы халықтың денсаўлығын беккемлеў бойынша айтарлықтай илажлар әмелге асырылмақта. Атап айтқанда, Президентимиз Ш.Мир­зиёев регионның суў ресурсларынан биргеликте пайдаланыў мәселесин шешиў, Арал теңизи ақыбетлериниң алдын алыўға қаратылған ҳәрекетлерди бирлестириўди елимиздиң сыртқы сиясатындағы әҳмийетли бағдарларынан бири сыпатында белгилеп берди.

Деген менен, ушырасып атырған машқалалар көлеми жағынан регионның экосистемасын тиклеўге ҳәм олардың турақлы раўажланыўына ерисиўге қаратыл­ған илажларға кең жәмийетшиликтиң итибарын қаратыўды талап етпекте. Себеби, Арал теңизи бассейниндеги мәмлекетлердиң экологиялық жағдайын турақластырыў, экономикасын раўажландырыў, ҳәр қандай социаллық машқалалардың шешимин табыў ҳәм халықтың ықлым өзгериўине бе­йимлесиўи бойынша биргеликтеги системалы ҳәрекетлерге ири инвестициялар ҳәм жаңа технологиялық және инновациялық шешимлерге мүтәжлик сезилмекте.

— Арал машқаласы туўралы көп еситкен болсақ та, жағдайды өз көзимиз бенен көриўге миясар болдық,-дейди Түркияның Өзбекстандағы елшиси Аҳмет Башар Шен. — Бул машқалаларды шешиўде қатнасықларымыз жылдан-жылға беккемленип атыр­ған бизиң елимиз де өз жәрдемин аямайды.

Мийманлар пайтахтымыздағы И.В.Савицкий атындағы көркем-өнер музейинде болды.

 

 

Басқа жаңалықлар RSS

02.08.2018 ЖЫНАЯТШЫЛЫҚҚА ҚАРСЫ ГҮРЕСИЎДЕ БИРГЕ ИСЛЕСИЎДИ КҮШЕЙТИЎИМИЗ ТИЙИС

Бердақ атындағы Қарақалпақ мәмлекетлик академиялық музыкалы театрында Өзбекстан Республикасы Президенти Шавкат Мирзиёевтиң басшылығында усы жыл 27-июль күни жынаятшылықтың ерте алдын алыў бағдарындағы жумыслардың бүгинги жағдайы, бул бойынша ишки ислер уйымлары ҳәм басқа да мәмлекетлик уйымлардың жуўапкершилигин арттырыў, системада жүзеге келген машқалалар менен кемшиликлерди сапластырыў мәселелерине бағышланып болып өткен  видеоселектор мәжилисинен келип шығатуғын ўазыйпаларға арналған ушырасыў болып өтти.
 

02.08.2018 ИНВЕСТИЦИЯЛЫҚ ЖОЙБАРЛАРДЫҢ ОРЫНЛАНЫЎ БАРЫСЫ ДОДАЛАНДЫ

Қарақалпақстан Республикасы Жоқарғы Кеңесинде республикамыз делегациясының сырт еллерге сапары даўамында дүзилген инвестициялық жойбарлардың ҳәм басқа да шәртнамалардың орынланыў барысы, бул бағдарда орын алып атырған айырым машқалалар және оның шешими бойынша алда турған ўазыйпаларға бағышланған мәжилис болып өтти.

24.07.2018 АРАЛ УЛТАНЫНДА ЖӘНЕ БИР ГАЗ ҚУДЫҒЫНАН ГАЗ ШЫҚТЫ

Бурын хабар еткенимиздей, «Үстирт геофизика экспедициясы» филиалы жәмәәти бүгинги күнде Үстирт кеңислиги ҳәм Аралбойы аймақларында ҳәм оның ултанында шет ел («Лукойл», “ERIEL”) компаниялары менен биргеликте тәбийғый жер асты байлықларын излеў ҳәм изертлеў жумысларын алып бармақта. Январь айында, олар тәрепинен төменги Сүргил кәни ашылып, оны өзлестириў бойынша жумыслар баслап жиберилген еди. Үстирт излеў-бураўлаў басқармасы менен биргеликте алып барылған жумыслар нәтийжесинде күни кеше бул жерде қазылған тағы бир қудықтан газ шыға баслады.

22.07.2018 КУБОК ЖЕҢИМПАЗЛАРЫ АНЫҚЛАНДЫ

Пайтахтымыз Нөкис қаласында спорттың мини футбол, волейбол ҳәм стол тенниси бойынша Қарақалпақстан Республикасы Жоқарғы Кеңесиниң кубогы ушын болып өткен жарыс жуўмақланып, жеңимпазлар анықланды.

20.07.2018 КӨШПЕЛИ ҚАБЫЛЛАЎЛАР

Өзбекстан Республикасы Президентиниң тапсырмасына бола, бүгинги күнде республикамыздың барлық қала ҳәм районларында көшпели қабыллаўханалар шөлкемлестириў режелестирилген. Қарақалпақстан Республикасы Жоқарғы Кеңесиниң Баслығы Муўса Ерниязов республикамыздың ең шетки аймақларынан бири болған — Қоңырат районының «Қарақалпақстан» посёлкасы турғынлары менен ушырасты.

17.07.2018 ПАЙТАХТЫМЫЗДА 55 МЕТР БИЙИКЛИКТЕГИ БАЙРАҚЛАР ОРНАТЫЛАДЫ

Өзбекстан Республикасы мәмлекетлик ғәрезсизлигиниң жигирма жети жыллық байрамы алдында Нөкис қаласында Өзбекстан ҳәм Қарақалпақстан Республикаларының мәмлекетлик байрақлары орнатылады.

16.07.2018 СПОРТ ОЙЫНЛАРЫНА СТАРТ БЕРИЛДИ

Республикалық ойын түрлери ҳәм жеңил атлетика бойынша қәнигелестирилген балалар ҳәм жас өспиримлер спорт мектебинде жарыстың ашылыў салтанаты болып өтти. Илажда  Қарақалпақстан Республикасы Жоқарғы Кеңесиниң комитет баслығы С.Турманов шығып сөйлеп, жарыс қатнасыўшыларына әўмет тиледи.