Қарақалпақстан Республикасы Жоқарғы Кеңеси

⌂ ЎЗ ҚР РУ EN

«АРДАҚЛАЎ — 2017» СЫЙЛЫҒЫ ӨЗ ИЙЕЛЕРИНЕ ТАПСЫРЫЛДЫ

Бердақ атындағы Қарақалпақ мәмлекетлик академиялық музыкалы театрында «Ардақлаў-2017» сыйлығының жеңимпазларын сыйлықлаў мәресими болып өтти.

Ашылыў салтанатында Қарақалпақстан Республикасы Жоқарғы Кеңесиниң комитет баслығы Д.Қурбаниязов, Министрлер Кеңеси Баслығының орынбасары М.Жуманов, Қарақалпақстан Республикасы мәденият министри П.Айтмуратов шығып сөйлеп, ҳүрметли Президентимиз Шавкат Мирзиёевтиң басшылығында мәденият, көркем өнер, спорт, журналистика тараўын раўажландырыў, дөретиўшилик аўқамлардың жәмийетлик турмысымыздағы орнын ҳәм абырайын арттырыў, олардың материаллық-техникалық базасын беккемлеўге қаратылып атырған ити­барға кең түрде тоқтап өтти. Нәтийжеде өткен жылы бул тараўларда айтарлықтай нәтийжелерге ерисилди. Әсиресе, дөретиўши инсанлардың машақатлы мийнетин хошаметлеў бағдарындағы илажлар қолға киргизилип атырған табыслардың тийкары болмақта.

Қарақалпақстан Республикасы Жоқарғы Кеңеси, Министрлер Кеңесиниң қоллап-қуўатлаўында республика Мәденият минис­трлиги тәрепинен дәстүрий тәризде өткерилип киятырған «Ардақлаў — 2017» дәстүрий сыйлығы усындай илажлардан бири.

Сыйлықлаў мәресими «Көркем-өнерге пидә өмир» еслеў номинациясын тапсырыў менен басланды. Ҳақыйқатында, пүткил өмирин республикамызда аяқ ойынды раўажландырыўға бағышлаған Өзбекистан ҳәм Қарақалпақстан халық артистлери, мархум Байрам Мурадов ҳәм Орынгүл Мурадовалар усы сыйлыққа мүнәсип деп табылды. Сыйлық олардың шаңарақ ағзаларына тапсырылды.  Буннан ке­йин «Жылдың ең жақсы нураный көркем өнер шебери» номинациясы И.Хожаметовқа, «Жылдың ең жақсы классикалық қосық атқарыўшысы» номинациясы Өзбекистан ҳәм Қарақалпақстан халық артисти Т.Дошумоваға, «Жылдың ең жақсы миллий қосық атқарыўшысы» номинациясы Өзбекистан ҳәм Қарақалпақстан халық артисти Г.Айым­бетоваға,  «Жылдың ең жақсы музей хызметкери» номина­циясы П.Хожаметоваға, «Жылдың ең жақсы көркем өнер жәмәәти» номинациясы Бердақ атындағы Қарақалпақ мәмлекетлик академиялық музыкалы театрына, «Жылдың ең жақсы театр режиссёры» номинациясы Ы.Айбатовқа, «Жылдың ең жақсы мәденият бөлиминиң баслығы» номинациясы Қоңырат ра­йонынан Н.Халмуратоваға, «Жылдың ең жақсы кино хызметкери» номинациясы Б.Низаматдинов­қа, «Жылдың ең жақсы театр актёры» номинациясы П.Қулимовқа, «Жылдың ең жақсы художниги»  номинациясы З.Сайыповқа, «Жылдың ең жақсы театр актрисасы» номинациясы Г.Жуманиязоваға, «Жылдың ең жақсы халық теа­тры» номинациясы Шымбай районлық халық театры жәмәәтине, «Жылдың ең жақсы балетмейстри» номинациясы С.Дүйсенбаевқа, «Жылдың ең жақсы ер аяқ ойыншысы» номинациясы Р.Шыразовқа, «Жылдың ең шебер аяқ ойыншысы» номина­циясы З.Жақсыбаеваға, «Жылдың ең жақсы мәденият бөлими мәкемеси» номинациясы Нөкис мәденият ҳәм көркем өнер колледжи жәмәәтине берилди. Сондай-ақ, «Жылдың ең жақсы ша­йыры», «Жылдың ең жақсы журналисти», «Жылдың ең белсенди телевидение баслаўшысы», «Жылдың ең жақсы радио журналисти»,  «Жылдың ең жақсы устазы», «Жылдың ең жақсы композиторы», «Жылдың ең жақсы спортшысы», «Жылдың ең үлгили балалар музыка ҳәм көркем өнер мектеби», «Жылдың ең жақсы спорт маликасы» номина­цияларының жеңимпазлары сыйлықланды.

— Ҳәр қандай хошамет дөретиўши инсанларды еле де көбирек мийнет етиўге талпындырады,-дейди «Жылдың ең жақсы шайыры» номинациясының жеңимпазы Жуманияз Өте­ния­зов. — Өткен жылы Ташкент қаласындағы «Шолпан» баспасында басылып шыққан «Өзбек балалар әдебиятының антоло­гиясы» китабында мениң «Қызыл суў», «Жайын», «Бекбосын балықшы», «Авс­тралия» гүрриңлерим жәрияланған болса, «Қарақалпақстан» баспасынан «Моншақ» қосықлар топламым басылып шықты. Барлық сыйлықланғанларды қутлықлай отырып, алдағы дөретиўшилик жумысларында табыслар тилеймен...

Солай етип, улыўма 38 номинация бойынша жеңимпазлар анықланып, шөлкемлестириўшилер тәрепинен  мүнәсип баҳаланды. Әлбетте, бул сыйлық оларды жаңадан-жаңа табысларға руўхландыратуғыны сөзсиз.

Илаж республикамыз көркем өнер шеберлериниң концерт бағдарламасы менен жуўмақланды.

 

Басқа жаңалықлар RSS

23.05.2018 А.Х.Сапарбаевты Беруний районы ҳәкими лаўазымына тайынлаў ҳаққында

А.Х.Сапарбаевты Беруний районы ҳәкими лаўазымына тайынлаў ҳаққында
Қарақалпақстан Республикасы Жоқарғы Кеңеси Баслығының
БИЙЛИГИ

23.05.2018 РАЙОНЛЫҚ КЕҢЕСТИҢ СЕССИЯСЫ

Халық депутатлары Беруний районлық Кеңсиниң гезексиз жигирма сегизинши сессиясы болып өтти.

18.05.2018 ЖОҚАРҒЫ КЕҢЕСТЕГИ ҚАБЫЛЛАЎ

Қарақалпақстан Республикасы Жоқарғы Кеңесинде Корея Республикасы «Evergreen Motors Group» компаниясының баслығы Ким Чанг Кеон басшылығындағы исбилермен, жәмийетлик ҳәм билимлендириў топары ўәкиллеринен ибарат делегацияны қабыллаў мәресими болды

17.05.2018 ОРАЙЛЫҚ САЙЛАЎ КОМИССИЯСЫНЫҢ МӘЖИЛИСИ

Усы жыл 17-май күни Қарақалпақстан Республикасы Орайлық сайлаў комиссиясының мәжилиси болып өтти.

Оны Орайлық сайлаў комиссиясының баслығы Е.Джуманазаров басқарып барды. 

08.05.2018 БАЙРАМ ТАМАШАЛАРЫНА УЛАСЫП КЕТТИ

Тарийхты еслеп жасаў, инсанды ардақлаў, өткенлердиң естелигин ҳүрметлеў — бул миллий қәдириятларымызда, дәстүрлеримизде айрықша орын тутады. Өйткени,  халқымыздың турмысында   өшпес из қалдырған бул сәне ҳәр бир шаңарақта, ҳәр бир қала ҳәм аўылда жыл сайын қуўаныш-қайғы менен  күтип алынады. Себеби, елимизде тәғдири мине усы сәне менен байланыспаған, яғный, ата-бабалары екинши жер жүзилик урыс­тың  зардабын тартпаған бирде-бир шаңарақ болмаса керек.

08.05.2018 ИНСАН ҚӘДИРИ УЛЛЫ, ЕСЛЕЎ МУҚАДДЕС

Пайтахтымыздағы «Ҳәсиретли ана» естелиги алдында 9-май — Еслеў ҳәм қәдирлеў күнине, сондай-ақ, Екинши жәҳән урысында қурбан болғанлардың ҳүрметине арналған мәресим болып өтти. 

04.05.2018 «МЕҲНАТ ФАХРИЙСИ» КӨКИРЕК БЕЛГИЛЕРИ ТАПСЫРЫЛДЫ

Қарақалпақстан Республикасы Жоқарғы Кеңесинде Өзбекистан Республикасы Президентиниң 2016-жыл 28-декабрьдеги «Өзбекистан ветеранларын социаллық қоллап-қуўатлаў «Нураний» қорының жумысын буннан былай да жетилистириў илажлары ҳаққында»ғы Пәрманы тийкарында шөлкемлестирилген I, II, III дәрежели «Меҳнат фахрийси» көкирек белгилерин тапсырыў салтанаты болып өтти.

02.05.2018 ЖОҚАРҒЫ КЕҢЕСТЕГИ ҚАБЫЛЛАЎ

Қарақалпақстан Республикасы Жоқарғы Кеңесинде усы жылдың 21 ҳәм 24-апрель күнлери аралығында Өзбекстан мусылманлары басқармасы тәрепинен шөлкемлестирилген Қуран жарысының «Ҳифз» жөнелиси бойынша биринши орын ийеси, жарыстың абсолют жеңимпазы жерлесимиз, Ташкент Ислам институтының талабасы Жолдасбай Нуритдиновты қабыллаў мәресими болды.

28.04.2018 МИЙНЕТТИ ҚОРҒАЎ: ЖАС ХЫЗМЕТКЕРЛЕРДИ ҚОЛЛАП-ҚУЎАТЛАЙМЫЗ

Қарақалпақстан Республикасы Жоқар­ғы Кеңеси жанындағы Пуқаралардың кепилленген мийнет ҳуқықларын тәмийинлеў мәселелери бойынша аймақлық комиссиясы ҳәм Қарақалпақстан кәсиплик аўқамлары шөлкемлери бирлеспеси Кеңесиниң шөлкемлестириўинде усы атамада «28-апрель — Дүнья жүзилик мийнетти қорғаў күни» мүнәсибети менен дөгерек сәўбети болып өтти.